Æ Øster-Ejn

Bemærk: Denne tekst er ikke korrekturlæst (endnu)!

Vi Jyder, dæ buer i æ Øster-Ejn
å plowwe wo Fuur imeld løwwend Hejn,
hwor æ Mulldjuer æ dyev å æ Banker æ grønn,
vi ka ett wal blyw fri for å si de kjønn:
æ Eng å æ Bæk å æ Skow å æ Stråend,
vi håer et jo ålldsammel lii ve æ Håend.

Æ Swaal bygge Ree ve wo Fåstowdaer,
æ Stork komme hjem mæ en Tus fræ æ Kjaer,
å ålld Stæjje, hwoe der æ tow om en Ree,
di synger å pipper om Sommer å Glee.
Men om Awtenen høer vi æ Skwulp fræ æ Stråend,
de ka lyyj som et Suk fræ et søwwne Båen.

Æ Øster-Ejns Pigger æ milld a Sind
som Lærkesang å som Søndenvind;
di vil nok ha en Mand, men hå Stoond te å bii,
te di finde de Kåålfolk di bæst ka lii.
Ka en så fo en Goer er en vaer å ta mej,
men si Lykk ka å grow o et Husmandsstæj.

Vi goer ad di Vejj, wo Forælder hå gaww'n,
de æ demm vi ka takk få, æ Vejj æ jawwn;
i æ Eng, hwoe vi sætte wo Hjøe i Stak,
die gik wo Forælder engong å holdt Snak.
Æ Joorbær, dæ skinne så røø o æ Diig,
di smagt osse godt, da wo Mue wa Piig.

Æ Øster-Ejns Moel wa de føøst vi kund stamm,
den Ejn ga wo Bååndomsminder dje Ramm;
den ga wos et Hjem å wo dawwle Brø,
den vil gi wos en Graw, næer en Daw vi skal dø.
Si Juer ska gi Grøø te Slæjt atte Slæjt,
så lænng som en Piig vil si mild te en Knæjt.

Næste afsnit

Teksten forekommer i følgende publikationer:

Udvalgte Jydske Digte 1948 - andet bind af Anton Berntsen (1949)

Udvalgte Jydske Digte 1968 af Anton Berntsen (1968)

Tilbage