Æ Koks Liigtåål

Bemærk: Denne tekst er ikke korrekturlæst (endnu)!

Vi hååd tow Kokk i wo Hønnsgoer en Ti,
å de wa den jenn få møj,
hwæ Daw wa dæ Slawsmoel å Skjænderi,
di villd ha hwerander øj.
Den stue wa dwalsk, å den lille wa sleg,
næer di mødtes omm bagve æ Låå;
dæ wa mie end jen å æ Høns dæ bløw bleg,
nær den stue vild sloos, å den lille skreg:
»Nå—nå—nå — do må ett gjø mæ Skåå!«

En Daw wa æ stue Kok bløwwen henn,
å æ Høns gik å wa så fåknøt,
æ lille Kok gik å lusket så jenn,
den grinnet så lumsk å så sødt.
Den keg bag æ Låådaer, den so sæ omkring,
— mon æ Hoorhjed skuld no vær fåbi,
helde stoer en et Stæj å æ lii o Spring? —
nææ — den æ væk — der æ ingenting,
tihihi — tihihi — tihihi!

Ve æ Kjøkkendaer legger æ YWS o en Blok,
hwa finder en die o æ Stjeen?
Die legger æ Howed å æ stue Kok,
men hwor æ si Krop å si Bjeen?
Den tåel te æ Høns: »Vil I strææv å komm,
et forondele Sjøen ska I si!
Hi legge wo Ven no, hans Ti er om,
han æ bleg om æ Nev å hans Ywn æ dumm,
— æ Stuehjed ka snåe vær fåbi!

Vi ved jo så wal, han wa hoer å stejl,
å mæ vild han gjaan ha læjjn ØØ,
men vi ande ka osse træf å ha Fejl,
en ska ålde tål undt om di døø.
En Mester han wa te å bruug æ Kjææv
te et mageløs Kykelikyy! —
ska en anden blyw så døgti, må en nok strææv«,
— å hie ga den Hykler sæ te å flææv:
»Tyhyhyy—tyhyhyy— tyhyhyyl «

Teksten forekommer i følgende publikationer:

Udvalgte Jydske Digte 1948 - andet bind af Anton Berntsen (1949)

Udvalgte Jydske Digte 1968 af Anton Berntsen (1968)

Tilbage