Den ny almenak

Mi Fåe wa Husmand, hans Indtæjte smo,
vi måt si å hold Huws, såen æ Pææng kund fåslo
te æ Føø å æ Klee å let billig Tobak,
men jet måt vi ha wos — en ny Almenak!
Henad Ywl, næer æ Sne lo så bløed som en Tæp,
drow mi Fåe te Byes mæ hans Kjowl å hans Kjæp.

En Daw i Desember ka osse vær long,
a prøwwet å lieeg, men kund ett kom i Gong,
å a keg te æ Klokk — mon han snåe skuld komm
fræ æ By mæ den ny Almenak i æ Lomm?
Er et Flinchs helde Wisbechs, han kjøøve i Oer,
æ dæ Belleder i en mæ Kjøer å mæ Foer?

Han kam i æ Mørkning, å vi fæk wos sat,
mi Mue håd travlt mej å spinnd te no Lat,
mi Fåe fåtoold, mens han snuww o en Siem,
helder osse så revvet han Ris te en Liem.
Men ålder et Uer kund a høør a dje Snak,
for a sad å løst i den ny Almenak.

Om guesindet Nesser, om gallsindet Trolld,
hwa Gawn di kund gjøør, å hwa Skåå di kund wolld,
om Pigger å Kåål, te der ett måt blyw gywt,
om Gooer å om Pææng, te de knev å fo skywt,
Prinsesser å Konger å Godtfolk å Pak,
om ålt kund en løøs i æ ny Almenak.

Te Verden wa stuer å forondele vi'
hjalp Wisbech å Flinch mæ da føst te å si,
mi Ywn stod så styww som Rosiner i Kååg,
så lænng der ino wa en Krønnik tebååg.
De æ manne Daww sien, men a mindes mæ Tak
di Folk, dæ wos lawwet den ny Almenak!

Teksten forekommer i følgende publikationer:

Jyske digte af Anton Berntsen (1969)

Udvalgte Jydske Digte 1968 af Anton Berntsen (1968)

Tilbage