Ved Grindsted Andelsklædefabriks 50 Aars Jubilæum
Æ LYNG klæjj æ Hie i manne Oer,
å æ Lyngtop ga Føø te Bier å Foer.
Æ Foer klæjj æ Folk, æ Uld bløw te Gåen,
a de band di Huesse te Vogsen å Båen.
Men dæ bløw så møj Uld, te di bygt en Fabrik
mæ Damp å Maskiner å møj Mekkenik;
no væwwe di Klee te Klæje så fiin,
de komme lii ud å en stue Maskiin.
Æ Lyng bløw te Grejs i di Oer dæ gik,
å æ Binndhues bløw te en stue Fabrik,
men ino ska di ha æ Uld fræ æ Foer,
- gid de må blyw ve i manne Oer!
Di sææreste Ting hå di no funden o,
no dannes dæ Klæje a Træ å a Stro,
et Fad Tykmjelk ka blyw te en ulden Vest,
- a trowe, de gammeldas Foors-Uld æ bæst!
Te Lykk da mæ di haltres Oer dæ gik,
gid di lænng må løww — bådde Foer å Fabrik!
Teksten forekommer i følgende publikationer:
| Awtensææd af Anton Berntsen (1945) |
Copyright ISCA Software 2023-