Sommer i mi Bååndom

Bemærk: Denne tekst er ikke korrekturlæst (endnu)!

Den Gong wa et regti Sommer,
Folk gik rundt å puust a Værrm,
hjeel wo Eng wa fuld a Blommer,
å æ Bi tow te å swærrm.

Åldting wa så glad å løwwend,
i hwæ Busk dæ wa en Ree,
hwor æ Unger ett wa fløwwen,
gavt di høwt å skreg a Glee.

Høwt tevejrs en Lærke kimet
som en Klokk, en knap ka høør,
ve æ Mødding lo en grimet
Sow å gnobbet dwask si Øør.

I en Mues mæ Dynd å Lævver
sad æ Frøer å sang Bas,
Kjøer gik å gumlet Klævver
trimmeltykk å wal tepas.

I æ Skow æ Kukkmand kukket,
Rådyr sprang i Hejn å Krat,
å en lille Skowwbæk klukket
i en Lawwning Daw å Nat.

Kjønnest wa Wohærres Himmel,
åå, hwo wa en dyev å blo,
en kund si sæ glad å swimmel
o di tuwsend Stjanne smol

Teksten forekommer i følgende publikationer:

Udvalgte Jydske Digte 1968 af Anton Berntsen (1968)

Tilbage