Bemærk: Denne tekst er ikke korrekturlæst (endnu)!
De wa Melldmaddaws, å vi sad ve æ Buer
mæ wo Fjettebrø å wo Tewand;
så hoor a, mi Fåe såå nowwe Uer
om jen, dæ vild draw te Ny Zeeland.
A lyyj — wa de nowwe hie fræ æ Sown,
dæ no kam å såen no Tanker?
De måt da ves vær jen, dæ wa ung å fåwown
å håd Løst te å røør æ Skanker?
Nææj, de wa en hallgammel, rynket Muer
fræ jen a di semplest Rønner;
hun vild om o den anden Sii o æ Juer
for å si te et Par a hind Sønner.
Di håd skrøwwen te hind å sæend æ Billæt,
di vild gjaan ha hind øwe te dem;
hun skuld komm inden hun bløw få gammel å træt
å så måt hun helst blyww ve dem.
Den Rejjs wa få wos som et Eventyr;
faar væænd vi wos knap for å si hind,
no keg vi — som atter et uddenlandsk Dyr
næer de træffet te vi kam fåbi hind.
Di manne Mil å de stue Wand
kund nok gjør en anden fåskrækket,
men hinnd Tanker -wa i de fremmet Land
ve hind Bøen, — de wa de dæ trækket!
Den Muen, hun drow å, bløw hun woed a Doeg,
hun rejjst i hind dawwle Rlæje,
dæ wa ingen dæ vinket Fåwal ve æ Tog,
hun tændt kons o Hans å Pæje.
Æ Kost o æ Skiv wa ett åldtfå gue,
å wal let værrm wa æ Senge,
men ok, hwa hå de å betyyj for en Mue,
dæ rejs for å si te hind Drenge!
Kristiane drow øwe de stue Haw,
hind Hytt æ få lænng sien jawwnet;
men et Stæj o Ny Zeeland æ der en Graw
mæ hind Nawn å »Elsket og savnet«.
Teksten forekommer i følgende publikationer:
| Udvalgte Jydske Digte 1948 - andet bind af Anton Berntsen (1949) |
| Udvalgte Jydske Digte 1968 af Anton Berntsen (1968) |
Copyright ISCA Software 2023-