Æ Hjoordreng

Bemærk: Denne tekst er ikke korrekturlæst (endnu)!

I Gue ga et Wand, æ Vejr wa hjaske,
æ Træsko swuppet ve hwæ Trin en goor,
æ Kjøer wa twæære, å æ Tyer wa naske,
mi Bowse slasket dryww-wood om mi Loor.
Den hiele longe Daw gik a å frøs,
å ve a kam i Seng lo a å nøs,
— de æ en træls Bestelling å vær Hjoor!

Men Vejr å Vind æ som Wohærre danner et,
å de ka væænd sæ faar en tænker o,
i Daw æ Verden lissom hiel foranderet,
æ Suel æ værm å blank, æ Himmel blo.
Mi Røkk æ taer, å bådde Tyer å Kjøer
å mæ æ no i rætten godt Humør,
hwa de æ vaer ka kons en Hjoor fåsto.

Wo Nååbos Hjoordreng smutte tit herøwe,
å vi lær ett æ Timer go te Spilld,
I ved ves ett, hwo grum vi tow så løwe,
vi tæænde wos et Boel å holde Gilld.
Så stiege vi Katøfler i æ Ååsk,
å a hå Frekadell-Mad i mi Tååsk,
— vi Hjoorer håer et liigodt ett så illd!

Å a æ kommen i mi Håsbonds Kriidhuws,
han snakker om, a ska ha mie i Løen,
å han hå lowet mæ et Bur mæ hwiid Muws,
— a håer et næsten som hans ejjen Bøen.
Han rues mæ, næer han sie mi Bjeen æ tunng,
så blywer a så stolt som nowwe Konng,
å a kund sprinng — ja lii op te æ Møen!

Å a må kom te Mærkend mæ mi Søster,
vi ska spis Kagger a di finest Fååd
å kjør i Karrusæll, så lænng vi løster,
å vi ska go å lank wos o æ Gååd.
Åk Gud, hwo håer en møj å glee sæ te,
a tænke tit: mon de å ka blyw ve?
— Wohærre ved da helder ingen Mååd!

Teksten forekommer i følgende publikationer:

Udvalgte Jydske Digte 1948 - første bind af Anton Berntsen (1949)

Udvalgte Jydske Digte 1968 af Anton Berntsen (1968)

Tilbage