Et Mirakel

Bemærk: Denne tekst er ikke korrekturlæst (endnu)!

I Awws wa a træt. Å mi Sind wa så tong,
a wa såen i mi Howed, te a slæt ett kund sammel,
men hwodan skuld æ Sind kund blyw ve å vær ung,
næer æ Syggen tå te, å æ Krop blywwe gammel?
De wa lissom åldting wa mæ imued,
de wa knap a vild swåår, næer mi Kuen snakket te mæ,
a håd undt ve å sjel træk en Hues a mi Fued,
å a tændt: No æ dæ da ett mie ve mæ!
Næer en ett ka gjø Liggn få si dawwle Brø,
ka en lisså godt leg sæ te å dø.

Men no hår a sowet så godt i Nat,
a wownt få let sien å gavt å rækket mæ,
a trowe de wa æ Suel dæ vækket mæ,
å i Daw ka a mærk de æ andeleddes fat.
A legge å lyyje, å åldt hwa a høer
en Høøn dæ kagler, en Kok dæ gåel —
de sætte mæ såen i godt Humør,
å a tØgges te a er en fååle Kåel!
A ka høør æ Klokk i æ Høkes Butik,
å de æ få mi Øør som den kjønnest Musik!

Di skramle mæ Træsko å Spannd i æ Goer,
å æ Stork stor å knævvere opp o æ Møen,
no trækker æ Lillepiig ves mæ æ Foer,
å uud fræ æ Gååd ka en høør nowwe Bøen.
Å høer te æ Gråsparre uud i æ Haww,
di sladre å hwippe å samle te Ree,
snåer æ di løste, å snåer æ di vree,
• — en fååle Bannis de Småkre ka lawwl
Å høer! No begynde Johannes å smee!
--- der er nued indeni mæ dæ synger a Glee!

I Awws wa a gammel — en uudløwet Stakkel —
i Daw er et lissom en nylle wa føj,
men te jen Nattes Søwn ka gjøør så møj,
---- de tøgges a, en må kåld et Mirakel!

Teksten forekommer i følgende publikationer:

Atterorsplowwen af Anton Berntsen (1971)

Tilbage