En salle Handel

Bemærk: Denne tekst er ikke korrekturlæst (endnu)!

Si, no hår a handlet i manne Oer
mæ Bæester å Kre å mæ Swien å Foer,
å jawnhen tint let Moneter,
men en ringer Handel hår a ålder goer
end den, a goor mæ Hans Peter.

I véd, han hår åldtie håed et let småt,
ræt møj te æ Føø hå han ålder fåt,
men da jen a hans Høwweder døø,
å hans Kuen lo sykk, de wa næsten få håt,
de wa lii ve a hiel leg ham ØØ.

A wa der en Daw, men a bløw der ett lænng,
de wa læt nok å si, te di hååd et strenng,
hwa di fæk te æ FØ, håd di bårret,
no — enhwæ ka sjel ha Brug få si Pææng,
å a ku jo da ett gjø for et.

A soold ham en Kuw få hunderåtres,
den wa towhunder vaer, de æ sekker å ves,
den wa rele fræ uddest te indest,
Hans Peter wa osse så godt tefreds,
men a fæk jo ingen Fåtjenest.

Men handel udden å tjeen nowwed ve et,
de tøgges a liigodt æ sælle,
såen plejjer a hæjsen ett å blyw Bét,
a fåstoer ino ett, hwa dæ narret mæ te 'et
en æ dawel ett ve å blyw hælle?

Teksten forekommer i følgende publikationer:

Atterorsplowwen af Anton Berntsen (1971)

Tilbage