Bemærk: Denne tekst er ikke korrekturlæst (endnu)!
Mi Nååbo, Pe Sme, æ en ondele jen,
de sæjer a, sjel om han å æ mi ven,
vil en tål for en sag, å så småt liste ve,
så spør han så tvæære: "hwa nøtt æ et te?"
Å syssel mæ blomster wa åldti mi glee,
vi hår i wo haww nowwe dejlige bee,
men kommer mi nååbo å sie mæ dæve,
så spør han så håånle: "Hwa nøtt æ et te?"
Musik a no åldti så godt hå ku li,
å somti a nynner en kjøn melodi,
men træffer et så, te a mødde Pe Sme,
han spør, som han plejer: "Hwa nøtt æ et te?"
Tit synger æ fowwl da så kjøn om æ måån, '
te å høør o dje sang ka han ålde fo ståån,
for æ føø å æ klee mo han jawn bjerre ve,
de andt ræjn han ett, for - hwa nøtt æ et te?
A tøkkes ett, verden wa te å hold ud,
Hwis ett åld de kjønn wa wos giwwen a Gud,
Ment ænk, om wo juer håd wan skavt a Pe Sme,
så trowr'r a, de kjønn håd ves ålde wan te!
Teksten forekommer i følgende publikationer:
| Udvalgte Jydske Digte 1948 - første bind af Anton Berntsen (1949) |
| Udvalgte Jydske Digte 1968 af Anton Berntsen (1968) |
Copyright ISCA Software 2023-